🌹නිවන් සුව විදින්නට – 1 කොටස
ඔබ බෞද්ධයෙක් නම් කුඩා කාලයේ සිටම “නිවන” යන වචනය නුහුරු දෙයක් නොවේ. බුදු රජාණන් වහන්සේ උදෙසා මලක් පූජා කොට, පහනක් දල්වා, සුවඳ කූරක් දල්වා හෝ කවර ආකාරයේ පුණ්යක්රියාවක් කොට අප පැතුවේ “නිවන”යි. ස්වාමින් වහන්සේ නමක් පවා අපට ආශිර්වාද කළේ එලෙසිනි.
“දෙව් මිනිස් සැප කෙළවර අමා මහ නිවනින් සැනසේවා “
“මෙතේ බුදුන් දැක නිවන් දකිම්වා “
මෙවැනි ප්රාර්ථනා අප කනට නුහුරු නොවේ.
නමුත් “අද අදම නිවන් සුවයෙන් සැනසේවා” ලෙසින් අපට ඇසී ඇත්තේ ඉතාමත්ම අල්ප වශයෙනි. නැතහොත් නැත්තටම නැතුවාක් මෙනි.
“නිවන” ප්රාර්ථනා කළඳ, “නිවන” යනු කුමක්දැයි අපට එතරම් දැනීමක්, අවබෝධයක්ද තිබුණේ නැත.
“නිවන් දැක්කොත් යළි ඉපදීමක් නැත” යන්න අප අසා ඇත. එවිට ඇත්තටම අප සිත් වලට ආවේ මහා සතුටක්ද ?
අප වටා මහත් ආදරයෙන් සිටින අම්මා, තාත්තා, සහෝදර සහෝදරයන්, මිතුරන්, නෑදෑයන්, සියළු දෙනා අතහැර නිවන් දැකීමට සැබවින්ම ඔබ සතුටු වූවාද? අවංකවම සිතනවානම් ‘නැත’ යන පිළිතුර ලැබෙනු ඇත.
දැන්ම නිවන් දකින්නට බැරි බවක් සිතට දැනෙන්නට විය. “නිවන” යනු හැමදාම “පසුවට කල් දමන දෙයක්” බවට පත්වූයේද එබැවිනි. එය කෙසේද යත් සසර කෙළවරටම දමන ලදී. නමුත් සෑම භවයකදීම, මේ සසර පුරාවටම අප කරමින් පැවතියේද එයයි.
බුදු රජාණන් වහන්සේ, මහ රහතන් වහන්සේලා නිවන් දැක යළි ඉපදීම නැති කොට ඇති බව අපි දනිමු. අප සිත් තුළ උන් වහන්සේලා කෙරෙහි ඇත්තේ අප්රමාණ ගෞරවයකි. “සාධු සාධු..” කියමින් අප මහත් වූ ශ්රද්ධා සිතින්, ඒ උතුමන් වහන්සේලා නිවන් දැකීමට කටයුතු කරන ලද ආකාරය ගැන සඳහන් කතා වලට සවන් දෙමු.
උන් වහන්සේලා කෙරෙහි මහත් වූ ශ්රද්ධාවෙන් අප්රමාණ පින් කම් වල යෙදෙමු.
යෙදී සියළු ලෞකික ප්රාර්ථනා අවසානයේ “සැප කෙළවර නිවන” ද ප්රාර්ථනා කරමු. මේ මොහොතේම, වහ වහා මේ දැන්ම නම් “නිවන ” ඕනෑ වූ අය ඉතාමත්ම ඉතාමත්ම අල්පය.
මෙය වූ කලී බෞද්ධයාගේ සැබෑම ප්රායෝගික තත්වයයි.
බුදු රජාණන් වහන්සේ විසින් ” අසුර ගසන ක්ෂණයක තරම්වත් කාලයක් භවයේ රැඳී සිටීම වර්ණනා නොකරමි” යනුවෙන් දේශනා කොට පවතිද්දී..,
” හිස ගිනි ගත්තත් ඒ ගින්න නිවන්නට වත් පමා නොවී අවබෝධ නොකළ චතුරාර්ය සත්ය අවබෝධ කරන්න” යැයි දේශනා කරද්දී…
උන් වහන්සේ කෙරෙහි අපමණ ශ්රද්ධාවෙන් යුත් බෞද්ධයන්, උන් වහන්සේටම පුද පූජා පවත්වමින් , පින් රැස් කරගනිමින් තව තවත් භවයම පතන්නට පුරුදු වී ඇත්තේ ඇයි ?
මේ සියල්ලටම හේතුව නොදන්නාකමය.
කුමක් නොදන්නා කමද ?
ඇත්ත වශයෙන්ම ගතහොත් කිසිවක් පිළිබඳව හරි හැටි නොදත් කමය.
අප කොතෙක් පුද පූජා කළඳ, පුරුද්දට ඇතිවූ ශ්රද්ධාවක්, භක්තියක්, ගෞරවයක් තිබුණද, මේ මේ දේ කළහොත් පින් ය , පව් ය කියා අසා තිබුණද කිසිවක්ම ගැන පැහැඳිළි අවබෝධයක්, මනා දැක්මක් නොතිබීමම මෙයට හේතුවය.
ඇත්තෙන්ම අප,
☸ බුදු රජාණන් වහන්සේ යනු කවුරුන්ද ?
☸ උන් වහන්සේ දේශනා කළ ධර්මය කුමක්ද ?
☸ ඒ ධර්මය පිළිපැඳීමෙන් කුමක් ලැබෙන්නේද ?
☸ එය පිළිපඳින්නේ කෙසේද ?
☸ ඒ දහම පිළිපඳින්නට ආරම්භය කුමක්ද ?
☸ කුමක්ද මේ සසර ?
☸ සෝවාන්, සකදාගාමි, අනාගාමි, අරහත්, නිවන යනු මොනවාද ?
ආදී කිසිවක් ගැන හරියාකාරයෙන් දන්නේ නැත.
එසේ දැන සිටියානම් අප මොහොතක්වත් ප්රමාද වන්නේද නැත..!
එසේ අප නොදන්නා දේ ගැන ක්රමානුකූලව පියවරෙන් පියවර දැන ගනිමින්, නිවන ලබා ගන්නා ආකාරය ගැන පැහැඳිළි අවබෝධයක් ලබා ගැනීමට, ඔබගේ අදහස් , යෝජනා, ගැටළු වලට හැකි අයුරින් පිළිතුරු සපයමින් , බහුතරයක් දෙනාට අවබෝධ කර ගැනීමට පහසු අයුරින්, සරලව මේ ලිපි මාලාව ඉදිරිපත් කිරීමට බලාපොරොත්තු වෙමු.
හැකි තරම් මෛත්රි, කරුණා පිරිසිදු සිතින් ලියමි. කියවන ඔබද එලෙසින්ම වේවා…!!!
මතු සම්බන්ධයි…!.
☸ධර්ම දානය පිණිස මිතුරන් අතර share කරන්න☸
🌹තෙරුවන් සරණයි 🌹
අමාදහර 